Gen 17 | ZomZIV | STEP | Abram kum sawm kua-le-kua a phak ciangin ama kiangah TOPA kilanga, “Keimah, a Thahat pen Pasian ka hi hi; ka mai-ah pai inla kawkbaang kei in.

Genesis 17

Vun-atna-a Thukhun

1 Abram kum sawm kua-le-kua a phak ciangin ama kiangah TOPA kilanga, “Keimah, a Thahat pen ^{▼▼17.1 Hebrew ah El-Shaddai} Pasian ka hi hi; ka mai-ah pai inla kawkbaang kei in. 2 Kei le nang kikala ka thukhun ka kipsak dinga hong pungsakin tampi kong phasak ding hi,” ci hi. ^b

3 Abram khupbawh suka Pasian in ama kiangah, 4 “Kei adingin hih in nang tawh ka thukhun ahi hi! Nang, minam tampite’ pa na hi ding hi. 5 Nang, Abram ^{▼▼17.5 Abram pen pa kitawisang cihna.} hong kici nawn lo ding hi; Na min Abraham ^{▼▼17.5 Abraham pen tampite’ pa cihna} hi ding hi; Minam tampite pa-in nang kong bawl zo hi. 6 Nang kong ciphasak dinga; minam liante hong suaksakin nang panin kumpite piangkhia ding hi. 7 Keimah in na Pasian le nang nunga na suan-le-khakte’ Pasian ka hina dingin tawntung thukhun in kei le nang le hong tung lai ding khangte-a na suan-le-khakte tungah thukhun kip ka bawl ding hi. 8 Tu laitaka mikhual na hina Canaan leitang bup, nang le nang nunga na suan-le-khakte neih tawntung dingin kong pia dinga; kei amaute’ Pasian ka hi ding hi.” ci hi. ^e

9 Tua ciangin Pasian in Abraham kiangah, “Nang ahileh nang le nang nunga khang na suan-le-khakte tunga ka thukhun zui pelmawh in. 10 Hih in na zuih pelmawh ding nang le nang nunga na suan-le-khakte tawh ka thukhun ahi hi, na zuih ding uh thukhun in: Note laka pasal peuhmah vun ki-at ding hi. 11 Na vun na at dinga, tua pen nang le kei kikala thukhun lim hi ding hi. 12 Mailama khangte adingin, no inn sunga suakte ahi a, gamdang mite tunga sum tawh na leite uh - no sung pana piang a hi lote a hi zongin pasal peuhmah nigiat a phak nak leh a vun ki-at pelmawh ding hi. 13 No innkuan sunga suakte ahi a, sum tawh na leite uh ahi zongin amaute vun ki-at pelmawh ding hi. Note ci-le-sa sunga ka thukhun, tu le a tawntunga thukhun ahi hi. 14 Pasal vun at lo, a ci-le-sa vun at lo peuhmah ama mite pan kikhenkhia ding hi; amah ka thukhun a palsat ahi hi,” ci hi. ^f

15 Pasian in Abraham tungah, “Na zi Sarai ahileh Sarai na ci nawn kei ding hi; ama min Sarah hi ding hi. 16 Thupha ka pia dinga, amah panin tapa khat kong pia taktak ding hi. Amah minamte’ nu ahi theih nadingin thupha ka pia ding hi; minamte’ kumpite amah panin piang ding hi,” ci lai hi.

17 Abraham khupbawha, nui-in amah le amah, “Kum zakhat a phasa mi khat sungah tapa piang ding maw? Kum sawm kua a phasa Sarah in ta nei ding maw?” a kici hi. 18 Tua ciangin Abraham in Pasian kiangah, “Ishmael in nang ma thupha sangin minungta-a hong om nak leh!” a ci hi.

19 Tua ciangin Pasian in, “Sang thei ding hi, ahi hangin na zi Sarah in nang tawh tapa khat nei dinga, ama min Isaac ^{▼▼17.19 Isaac pen amah nui cihna} na phuak ding hi. Ama nunga a suan-le-khakte ading tawntung thukhun ahi dingin amah tawh thukhun ka bawl ding hi. 20 Ishmael ahileh, na gen ka za zo hi! Thupha ka pia takpi ding hi; amah ka ciphasak dinga pungsakin tampi ka phasak ding hi. Amah gam-uk sawm le nihte’ pa hi dinga minam lian khat ka suaksak ding hi. 21 Ahi hangin mai kum tu hun ciangin Sarah tawh na neih ding Isaac tawh ka thukhun ka bawl ding hi,” a ci hi. 22 Abraham tawh a kiho a man ciangin ama kiang pan Pasian a paikhia to hi.

23 Tua ni tektek in Abraham in a tapa Ishmael le ama inn sunga suakte le sum-a a leite khempeuh, a inn sunga pasal peuhmah, Pasian gen bangin amaute’ vun a at hi. 24 Abraham in a vun a at in kum sawm kua le kua pha a, 25 a tapa Ishmael kum sawm le thum pha hi. 26 Abraham le a tapa Ishmael in a ni kibangin vun at khawm uh hi. 27 Ama inn sunga suakte ahi a, gamdang mite tunga a leite ahi zongin Abraham innkuan sunga pasal peuhmah in amah tawh vun at uh hi. ^h